Policia e Tiranës ka reaguar pas përplasjeve mes përfaqësuesve të Partisë Demokratike dhe atyre të Partisë Socialiste, pranë gjimnazit “Petro Nini Luarasi” në kryeqytet.
Në një deklaratë për mediat, Policia bëri me dije se, nën drejtimin e prokurorit të gatshëm pranë SPAK, po kryhen të gjitha veprimet procedurale dhe hetimore për të dokumentuar ngjarjen.
Përfaqësuesit e opozitës, Belind Këlliçi, Adriana Kalaja, Grigels Muçollari dhe Tedi Blushi, kanë denoncuar se në një ambient në rrugën “Marko Boçari” po zhvillohej aktivitet i paligjshëm zgjedhor nga ana e PS.
Policia ka ushtruar kontroll në ambientin e raportuar, por nuk ka konstatuar shkelje ligjore. Disa persona janë shoqëruar në komisariat për të dhënë deklarime.
Njoftimi i policisë:
DVP Tiranë/Informacion paraprak
Strukturat e Drejtorisë Vendore të Policisë Tiranë, nën drejtimin e prokurorit të gatshëm pranë SPAK, janë duke kryer të gjitha veprimet procedurale dhe hetimore, për dokumentimin e një rasti të pretenduar sot, më datë 11.05.2025, në një ambient në rrugën “Marko Boçari”, Tiranë, ku eshte pretenduar për veprimtari të paligjshme zgjedhore.
Rreth orës 17:50, pas një njoftimi të bërë nga z. Belind Këlliçi, përfaqësues i Partisë Demokratike, shërbimet e Policisë shkuan në vendin e pretenduar dhe konstatuan disa shtetas pranë dhe brenda nje ambienti privat, që sipas kallëzuesve funksiononte si zyrë elektorale, pa shenja identifikuese, për Partinë Socialiste.
Gjatë kontrollit të ushtruar në prani të përfaqësuesve të të dyja subjekteve politike, në atë ambient nuk u gjetën materiale kompromentuese apo të kundërligjshem. Personat e pranishëm u shoqëruan në ambientet e Komisariatit të Policisë Nr. 2, ku janë marrë deklarime dhe kallëzime penale nga të dyja palët përfaqësuese të dy subjekteve politike. Përfaqësuesi i Partisë Socialiste, z. Erion Braçe, ka kallëzuar se përfaqësues të Partisë Demokratike kanë ushtruar forcë ndaj tij dhe personave të tjerë me të cilët ishte i shoqëruar.
Grupi hetimor po administron pamjet filmike dhe çdo provë tjetër me qëllim dokumentimin e plotë të rrethanave të ngjarjes. Hetimet vijojnë nën drejtimin e Prokurorisë.
Në përfundim të veprimeve procedurale, do të jepet një njoftim i plotë mbi rezultatet e hetimit.
