29-vjeçari nga Fieri, Romeo Mersini, i cili u konsiderua si heroi i muajit tetor për gjestin që bëri duke shpëtuar një çift të moshuarish nga zjarri një javë më parë, është arrestuar nga policia.
Sipas raportimeve, Mersini është përfshirë në një konflikt me xhaxhain e tij. Sherri ka përshkallëzuarr deri në përdorimin e mjeteve të forta. Për këtë arsye është arrestuar ‘heroi’ i Fierit.
Bashkë me të në pranga ka përfunduar edhe vëllai i tij 32-vjeçar, M. Mersini i cili është përfshirë në konflikt. Sipas policisë, të dy vëllezërit janë arrestuar nga Specialistët për Hetimin e Krimeve të Komisariatit të Policisë Fier, për shkak të dhunës së përdorur në konflikt.
Kujtojmë se pak ditë më parë, në lagjen “15 Tetori” të Fierit, një banesë u përfshi nga flakët ndërsa brenda ndodheshin dy të moshuar. Djali i tyre ishte ai që i vuri flakën shtëpisë me synimin për të vrarë prindërit. Për këtë rast, Gjykata e Fierit ka vendosur që 42-vjeçari Altjon Sulejmanaj, i cili akuzohet për përpjekjen për vrasje të prindërve të tij Shaqir dhe Selfixhe Sulejmanaj, të shtrohet me detyrim në spitalin psikiatrik.
