Deputeti demokrat Luan Baçi pretendon se gjatë përplasjes fizike me punonjësit e policisë, një prej këtyre të fundit i ka drejtuar armën e shërbimit.
Ai pretendon se punonjësi, me të cilin më pas u përplas duke i hequr edhe kapelen e uniformës, e ka kërcënuar.
“Në momentin që ne ishim te porta, vjen një grup tjetër i FNSH dhe ne u kthyem nga porta për të ikur të parlamenti, nuk ka lanë dhe na ndaluan. Një nga policët më vuri skafandrën përballë, u mundova dhe e shtyva me skafandër. I thashë largohu se do futemi, do hyjmë andej. Ai menjëherë hapi xhaketën dhe më tha mua direkt te pistoleta dorën, në atë moment unë e shyva dhe nuk e di çfarë kam bërë, mbase ndonjë gjë që s’duhej. I hoqa kapelen nga koka dhe mbase nuk ishte veprim që duhej bërë por në ato momente u ndjeva i ofenduar ku një deputet brenda territorit të parlamentin i nxirret arma nga një punonjës policie”, tha ai.
Opozita dhe protestuesit që e mbështesin tentuan të thyejnë kordonin policor për t’u futur në ambientet e brendshme të Kuvendit, gjë e cila solli edhe përplasje mes tyre.
