Klajdi Mustaj është efektivi i policisë i cili u bë hero duke shpëtuar jetën e tre të rinjve të aksidentuar në Fier.
Efektivi i policisë i cili u ndodh në vendin e aksidentit në momentin e duhur, nuk priti që të mbërrinte zjarrfikësja por ndërhyri menjëherë duke nxjerrë nga makina e cila kishte shpërthyer në flakë tre shtetasit që ndodheshin brenda.
Aksidenti i rëndë u regjistrua mbrëmjen e sotme, në zonën e Qafë Koshovicës ku një makinë tip ”Benz’’ humbi kontrollin, u përplas me një pishë dhe u përmbys në rrugë, duke shpërthyer në flakë.
Një qytetar ka filmuar momentin ku një efektiv polici i cili u gjend në vendngjarje pa pritur zjarrfikësit, ka hyrë mes flakëve dhe ka arritur të nxjerrë të gjallë katër personat e bllokuar në automjet. Veprimi i tij i guximshëm ka shmangur një tragjedi të madhe.
Qytetari që raportoi ngjarjen shprehet se falë ndërhyrjes së menjëhershme të policit, të plagosurit u shpëtuan nga vdekja e sigurt.
Për këtë akt guximi dhe përkushtimi në shërbim të jetës së qytetarëve, kryepolici Ilir Proda i akordoi punonjësit të Policisë Rrugore, Certifikatën për Shërbime të Dalluara!
“Veprimi i Inspektor Klajdi Mustaj tregon më së miri misionin e Policisë së Shtetit: të jemi aty ku qytetarët kanë më shumë nevojë për ne. Guximi, profesionalizmi dhe reagimi i shpejtë i punonjësit tonë në shpëtimin e tre bashkëqytetarëve është shembull frymëzues për të gjithë trupën policore.
I shpreh mirënjohjen time dhe të gjithë Policisë së Shtetit për këtë akt human e profesional.
Faleminderit për guximin dhe zemrën e madhe që tregove në shërbim të qytetarëve. Angazhimi, përkushtimi, profesionalizmi, sakrifica, ndershmëria dhe humanizmi duhet të jenë motoja jonë në përmbushjen e detyrës, fytyra dhe imazhi i ri i Policisë së Shtetit”, thuhet në mesazhin e kryepolicit.
