Paul Pogba pritet të mbyllë shumë shpejt aventurën e tij te Monaco. Sipas La Gazzetta dello Sport, drejtuesit e klubit kanë vendosur të ndahen me mesfushorin 32-vjeçar, pasi paraqitjet e tij nuk kanë qenë bindëse dhe problemet fizike e kanë mbajtur larg ritmit optimal.
Raportohet se klubi nuk e sheh të arsyeshme të vazhdojë të paguajë një pagë të lartë për një lojtar që në gjysmë sezoni ka luajtur gjithsej jo më shumë se 30 minuta. Edhe pse kontrata e Pogba-s me Monaco-n është e vlefshme deri në verën e vitit 2027, “monegaskët” po kërkojnë mënyra për ta larguar mesfushorin.
Aktualisht, Pogba po rikuperohet nga një dëmtim në kockën e kërcirit (shinbone), i pësuar në një ndeshje kundër Rennes. Francezi u bashkua me Monaco-n në verën e 2025-ës pas një pezullimi të gjatë për doping, por deri tani ka bërë vetëm 3 paraqitje me minuta shumë të kufizuara. Vlera e tij në treg vlerësohet rreth 5 milionë euro nga Transfermarkt.
