Një plagosje me armë zjarri është regjistruar mbrëmjen e kësaj të hëne në Tiranë, në zonën e Saukut të Vjetër.
Sipas policisë, i plagosur ka mbetur një shtetas turk, i identifikuar si Halil Uçar 39 vjeç, i cili dyshohet se është qëlluar me armë brenda një lokali në këtë zonë.
Policia thotë se shtetasi turk është paraqitur në spital dhe ndodhet jashtë rrezikut për jetën, ndërsa nuk dihen ende rrethanat e ngjarjes apo kush është autori.
“Më datë 09.03.2026, rreth orës 19:25, është paraqitur për mjekim në spital shtetasi i huaj turk H. U, 39 vjeç, i cili dyshohet se është plagosur me armë zjarri në një lokal në Sauk. 39-vjeçari ndodhet jashtë rrezikut për jetën”, – thuhet në njoftimin e Policisë.
Grupi hetimor po punon për identifikimin dhe kapjen e autorit si dhe sqarimin e plotë të rrethanave të rastit.
