Një plagosje me thikë ka ndodhur mbrëmjen e sotme (24 mars) në qytetin e Beratit.
Një i moshuar 85-vjeçar mbeti i dëmtuar rëndë dhe u dërgua në spital, ndërsa autori u arratis nga vendngjarja.
Krimi ndodhi në ambientet e një lokali në lagjen “Çelepias”, në Berat.
Autori i dyshuar mësohet se është identifikuar si Dhane Fatiu, i cili ka hyrë në lokal duke qëlluar me thikë në bark punonjësin e këtij lokali, Todi Biçaku.
“Rreth orës 19:00, në lagjen, Çelepias, Berat, në ambientet e një lokali, dyshohet se për motive të dobëta, shtetasi A. F., 37 vjeç, ka plagosur me mjet prerës (thikë), shtetasin T. B., 85 vjeç , i cili ndodhet në spital. Shërbimet e Policisë, ndodhen në vendngjarje dhe vijojnë krehjen e zonës për kapjen e autorit të dyshuar”, bëri me dije policia, teksa motivet mbeten të panjohura ende..
I plagosuri është transportuar drejt Spitalit Rajonal Berat, kurse autori është larguar nga vendngjarja. Policia vendore ka nisur hetimet për krimin dhe zbardhjen e plotë të tij.
