Nënkomisarë e inspektorë në Shkodër e Lezhë janë pezulluar këtë të mërkurë nga radhët e Policisë së Shtetit.
Agjencia e Mbikëqyrjes Policore në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Shkodër, kanë ekzekutuar masat e sigurimit personal “Pezullimi i ushtrimit të një detyre a shërbimi publik” dhe “Ndalim i daljes jashtë shtetit” ndaj gjashtë punonjësve të Policisë, të dyshuar për kryerjen e veprës penale “Shpërdorimi i detyrës” e kryer në bashkëpunim.
Konkretisht janë pezulluar:
Nënkomisar Ardian Baçina me detyrë Ekspert kriminalist pranë DVP Shkodër.
Inspektor Sokol Kroni me detyrë Ndihmës Specialist për Policimin në Komunitet në Komisariatin e Policisë Shkodër.
Inspektor Zef Doçi me detyrë Patrullë e Përgjithshme në Komisariatin e Policisë Shkodër.
Inspektor Kristjan Lokthi me detyrë Patrullë e Përgjithshme në Komisariatin e Policisë Shkodër.
Nënkomisar Gjergj Mala i cili në kohën e kryerjes së veprës penale qenë me detyrë Shef i Stacionit Policor në Theth, dhe aktualisht Zv/Shef Seksioni/Specialist në Seksionin Special të Ndërhyrjes Taktike në Njësinë Speciale “RENEA”.
Inspektor Faik Latifi me detyrë Ndihmës Specialist për Policimin në Komunitet në Komisariatin e Policisë Shkodër.
Nga hetimet e thelluara disa mujore dyshohet se këta punonjës policie nuk kanë asgjësuar rreth 1000 bimë narkotike, të cilat u gjetën në proces tharje gjatë një operacioni të zhvilluar në Korrik të këtij viti, pavarësisht se janë konstatuar nga ana e tyre gjatë kontrollit të territorit në Njësinë Administrative Shalë, Bashkia –Shkodër.
