Themeluesi i gjigantit të modës Mango, Isak Andic, ka humbur jetën këtë të shtunë në një aksident. Sipas mediave të huaja mësohet se 71-vjeçari ra në një luginë gjatë një shëtitjeje në një vargmal.
Policia rajonale e Katalonjës tha për CNN se u njoftuan të shtunën pasdite se një burrë 71-vjeçar kishte rënë në një luginë prej më shumë se 320 metra në zonën e shpellave Collbato të Salnitre, një destinacion popullor turistik pranë Barcelonës.
Për lajmin e trishtë ka reaguar edhe shefi ekzekutiv i Mango, Toni Ruiz i cili i trishtuar nga kjo humbje u shpreh se Andic ja kushtoi jetën e tij Mango-s duke lënë gjurmë të thellë në të.
“Ai ia kushtoi jetën Mango, duke lënë gjurmë të pashlyeshme falë vizionit të tij strategjik, lidershipit të tij frymëzues dhe angazhimit të tij të palëkundur ndaj vlerave që ai vetë i mbarti në kompaninë tonë”, thuhet në deklaratë.
Lidhur me vdekjen e Isak Andic ka reaguar edhe kryeministri spanjoll, Pedro Sanchez
“Gjithë dashurinë time dhe njohjen për punën tuaj të madhe dhe vizionin e biznesit, i cili e ka kthyer këtë markë spanjolle në një referencë botërore në modë,” shkroi Sanchez në X.
Andic kishte një pasuri neto prej 4.5 miliardë dollarësh, sipas Forbes . Ai themeloi markën Mango në Barcelonë, Spanjë në 1984.
Mango është një nga grupet kryesore të modës në Evropë, sipas faqes së internetit të kompanisë, me dyqane në mbi 120 tregje. Në vitin 2023, shitjet e kompanisë kaluan 3.2 miliardë dollarë.
Kompania aktualisht operon 40 dyqane në SHBA dhe planifikon të hapë 20 të tjera vitin e ardhshëm, sipas faqes së internetit të Mango.
