Presidenti ukrainas Volodymyr Zelensky ka deklaruar se pesë persona kanë humbur jetën dhe dhjetëra mijëra kanë mbetur pa energji elektrike pas një vale të fuqishme sulmesh ajrore nga Rusia gjatë natës, me raketa dhe dronë.
Katër prej viktimave ishin anëtarë të së njëjtës familje, mes të cilëve një vajzë 15-vjeçare. Ata u vranë nga një goditje në fshatin Lapaivka, ndërsa sulmet u përqendruan në qytetin perëndimor të Lvivit. Një tjetër person u vra në Zaporizhzhia.
Siç raporton BBC, presidenti Zelensky tha se Rusia ka lëshuar mbi 50 raketa dhe rreth 500 dronë sulmues.
Në të njëjtën kohë, Polonia, fqinje me Ukrainën, dërgoi avionë luftarakë për të mbrojtur hapësirën ajrore të saj, konfirmoi ushtria polake, ndërsa edhe avionë të NATO-s u aktivizuan. Rusia nga ana e saj deklaroi se kishte realizuar me sukses një “sulm masiv” ndaj objektivave ushtarake dhe infrastrukturore në Ukrainë.
Një tjetër anëtar i familjes në Lapaivka u plagos, ashtu si edhe dy fqinjë të tyre. Qyteti Lviv u godit për disa orë, çka solli ndërprerje të transportit publik dhe mungesë të energjisë elektrike.
Zelensky raportoi se sulme të tjera ndodhën edhe në rajonet Ivano-Frankivsk, Chernihiv, Sumy, Kharkiv, Kherson, Odesa dhe Kirovohrad.
Ai theksoi: “Na duhet më shumë mbrojtje dhe zbatim më i shpejtë i marrëveshjeve të mbrojtjes, sidomos për mbrojtjen ajrore, për t’i hequr kuptimin këtij terrori ajror. Një armëpushim i njëanshëm në ajër është i mundur dhe pikërisht kjo mund të hapë rrugën për diplomaci të vërtetë.”
Sulmet e fundit ruse vijnë vetëm disa ditë pasi një zyrtar amerikan deklaroi se SHBA-të do të mbështesin goditjet ukrainase në thellësi të territorit rus.
“Avionët polakë dhe aleatë janë duke operuar në hapësirën tonë ajrore, ndërsa sistemet tokësore të mbrojtjes ajrore dhe të zbulimit me radar janë në gatishmëri të lartë,” tha Komanda Operative e Polonisë në një postim në X.
Mbi 73 mijë konsumatorë pa energji elektrike
Në orën 05:10 në të gjithë territorin e Ukrainës u lëshuan sirena ajrore pas paralajmërimeve të Forcave Ajrore për sulme të reja me raketa dhe dronë nga Rusia. Rusia vazhdon të përqendrojë goditjet e saj ndaj infrastrukturës energjetike të Ukrainës, ndërsa afrohet dimri.
Ministria e Energjisë së Ukrainës tha se sulmet gjatë natës shkaktuan dëme në Zaporizhzhia, Chernihiv dhe Sumy. Në Zaporizhzhia, më shumë se 73 mijë konsumatorë mbetën pa energji elektrike pasi u godit një termocentral, sipas guvernatorit rajonal Ivan Fedorov. Një grua u vra dhe disa të tjerë u plagosën, përfshirë një vajzë 16-vjeçare që mori ndihmë mjekësore.
Kryebashkiaku i Lvivit, Andriy Sadovyi, tha se një pjesë e qytetit, që shtrihet 70 kilometra nga kufiri me Poloninë, kishte mbetur pa energji, duke shtuar se sistemet e mbrojtjes ajrore u angazhuan intensivisht për të zmbrapsur fillimisht një sulm me dronë dhe më pas me raketa.
Në qytetin tjetër perëndimor, Ivano-Frankivsk, kryebashkiaku njoftoi se transporti publik do të niste më vonë se zakonisht të dielën për shkak të situatës.
Që nga fillimi i pushtimit të plotë rus në vitin 2022, forcat ruse kanë pushtuar shumicën e rajonit lindor të Donbasit, përfshirë Luhanskun dhe Donetskun. Aktualisht, Rusia kontrollon rreth një të pestën e territorit të Ukrainës, përfshirë Gadishullin e Krimesë, të aneksuar në vitin 2014.
Nga ana tjetër, mediat shtetërore ruse raportuan se njësitë e mbrojtjes ajrore të Rusisë shkatërruan 32 dronë ukrainas gjatë natës, sipas Ministrisë së Mbrojtjes.
Ukraina ka intensifikuar sulmet ndaj rafinerive ruse të naftës, duke shkaktuar mungesa të karburantit në disa zona të Rusisë.
