Zjarret e fuqishme që kanë përfshirë Los Anxhelosin kanë lënë pas imazhe apokaliptike, me dhjetë viktima dhe mijëra hektarë tokë e shtëpi të shkrumbuara. Ashtu siç paralajmëruan ekspertët, flakët kanë shpërthyer me një intensitet të tillë saqë është e paqartë nëse do të mund të shuhet nëse moti nuk ndryshon. Megjithatë, ndërsa qyteti përballet me një tragjedi të tillë, një fenomen tjetër po përhap frikë: vala e plaçkitjeve.
Sipas mediave, grabitësit kanë shfrytëzuar kaosin dhe panikun që ka shpërthyer në qytet për të vjedhur në shtëpitë e braktisura nga banorët që janë larguar për të shpëtuar jetën. Ata hyjnë në banesa dhe rrëmbejnë gjithçka gjejnë përpara. Pavarësisht përpjekjeve të autoriteteve, të paktën 20 persona janë arrestuar deri tani, por grabitësit janë shumë më tepër. Në këtë kaos, qindra-mijëra njerëz janë detyruar të lënë shtëpitë e tyre, duke u larguar në kërkim të sigurisë.
Për të përballuar këtë situatë, trupat e Gardës Kombëtare të Kalifornisë janë angazhuar në operacione për të ndaluar plaçkitësit dhe për të mbajtur rendin. Po ashtu, forcat e sigurisë janë vënë në gatishmëri, por është ende e paqartë se sa gjatë do të qëndrojnë në qytet.
Në këtë atmosferë të pasigurisë, shumë banorë frikësohen të kthehen në shtëpitë e tyre, duke e bërë më të vështirë rikthimin e normalitetit.
