Erion Braçe nuk e ka fshehur ambicien për të qenë ai kandidati i socialistëve për Tiranën në zgjedhjet e ardhshme lokale të 2027.
Kjo ambicie është shprehur me kujdes nga Erion Braçe gjatë një takimi me strukturat e njësisë 5, ku ai u zgjodh deputet pas largimit nga qarku Fier.
Dy burime nga kjo mbledhje i pohuan gazetarit të Top Channel Muhamed Veliu atë që mund të konsiderohet si sinjali i parë nga Braçe për Edi Ramën.
“Unë do ta vlerësoj mundësinë të kandidoj për Tiranën, por më duhet mbështetja juaj”, citohet të ketë thënë Erion Braçe, pasi janë diskutuar një mori problemesh me të cilat po përballet kryeqyteti.
Të njëjtat burime hedhin poshtë raportimet se Braçe i kishte vendosur ultimatum Ramës se, nëse nuk zgjidhet ai për Tiranën, do të garojë i pavarur.
Burime pranë Erion Braçes në njësinë 5, të kontaktuara nga Top Channel, thanë se “a do ta besonte kush nëse Erion Braçe do të thoshte se jam i pavarur në betejën për Tiranën?”
Të njëjtat burime thanë se kjo është nonsens, kur dihet se pas emrit Erion Braçe ka vetëm një prapashtesë, Partia Socialiste e Shqipërisë.
“Erion Braçe është një prej atyre socialistëve, si i tillë, ato që i konsideron si gjërat e shtëpisë (ato që diskutohen në PS dhe Njësinë 5) mbeten gjërat e shtëpisë”, u shpreh i njëjti burim.
Ndërkohë që Erion Braçe i ka ruajtur dhe ruan me fanatizëm “gjërat e shtëpisë”, kolegët e tij brenda partisë u kujdesën që ambicien e kandidimit ta spiunonin me shpejtësi.
Përpara zgjedhjeve të 11 majit, kur Belinda Balluku nuk e përfshiu Erion Braçen në skuadrën garuese të Fierit, u mësua për një hatërmbetje të fortë nga Braçe me Ramën, i cili e pozicionoi në skuadrën e Tiranës.
Debatet Braçe-Rama u mësuan prej atyre që kishin dijeni, por kur Erion Braçe, i cili e nisi karrierën e deputetit në Berat, u pyet për këtë privatisht, deklaroi:
“Epo ndaj s’jam si ata unë. Se kam bërë kurrë të flas brenda e t’i nxjerr jashtë”.
Gjithsesi, vlerësimi i mundësisë nga Erion Braçe për të qenë ai pasuesi i Erion Veliaj mbetet një zhvillim interesant brenda PS. (TCH)
