Kryeministri i Spanjës Pedro Sanchez urdhëroi të shtunën 5000 ushtarë dhe policë shtesë të dërgohen në Valencia pas kritikave të rënda të autoriteteve lokale për reagimin e tyre ndaj përmbytjeve vdekjeprurëse. Të paktën 211 persona kanë humbur jetën, ndërsa shumica e viktimave ndodhen në Valencia dhe zonat përreth.
Shiu i rrëmbyeshëm të hënën shkaktoi përmbytje të mëdha, duke shkatërruar ura dhe duke mbuluar qytete të tëra me baltë. Shumë komunitete u ndërprenë pa ujë, ushqim apo energji elektrike.
Kryeministri spanjoll e cilësoi këtë mobilizim si operacionin më të madh emergjent në Spanjë në kohë paqeje, duke theksuar se këto përmbytje janë ndër më të këqijat që Evropa ka përjetuar këtë shekull. Ata kërkojnë të zhdukur në bodrumet e përmbytura.
Në të njëjtën kohë, ekipe speciale në aktivitete nënujore po marrin pjesë në përpjekjet për gjetjen e personave të zhdukur në zonat e prekura. Madje, u publikuan video që shfaqnin këto grupe në bodrumet e ndërtesave të përmbytura. Në të njëjtën kohë, siç u bë e ditur, pas tre ditësh të bllokuar brenda makinës së saj, një grua u shpëtua nga një nënkalim i përmbytur në zonën Benetússer të Valencias.
Incidenti i cilësuar si një “mrekulli”, ka prekur komunitetin lokal, ndërsa tuneli në të cilin u gjet gruaja lidh Benetússer-in me Alfafar, dy zona të prekura keq nga stuhitë e fundit. Gazeta Las Provincias raporton se sapo shpëtimi përfundoi, gruaja u dërgua në spital për ndihmën e parë.
