Reshjet e dendura të shiut në Bosnje dhe Mal të Zi kanë shkaktuar përmbytje të rënda, duke rezultuar në 14 viktima deri tani dhe dëme materiale të pallogaritshme.
Në komunën e Shavnikut, dy lumenj dolën nga shtrati, duke përmbytur shtëpi dhe rrugë. Situata më e rëndë është raportuar në Podgoricë, ku niveli i lumit Moraça është rritur për 7.5 metra dhe ai i lumit Zeta për 5.5 metra.
Për shkak të reshjeve, qarkullimi është ndërprerë mbi dy ura dhe në një rrugë në Danilovgrad, rreth 20 kilometra larg Podgoricës.
Lokalet e plazhit në brigjet e lumenjve Moraça dhe Ribnicës janë përmbytur, duke shkaktuar telashe për bizneset lokale.
Instituti Hidrometeorologjik i Malit të Zi kishte lëshuar më herët alarmin e kuq të motit, duke paralajmëruar kushte të rënduara klimaterike.
Ministria e Brendshme ka rekomanduar që qytetarët të shmangen nga udhëtimet e panevojshme dhe të marrin masa për mbrojtjen e pronave, sidomos ata që jetojnë në zona të rrezikuara.
Situata vazhdon të jetë e tensionuar dhe autoritetet po vazhdojnë përpjekjet për të menaxhuar pasojat e këtij moti të keq.
