Burgun e Durrësit e ka përfshirë një situatë alarmante pas përmbytjeve të fundit që kanë goditur qytetin. Ujërat e ndotur kanë shpërthyer dhe kanë përmbytur katin e parë të burgut, ku ndodhen të dënuar, por edhe persona në hetim e gjykim.
Burgu, i ndodhur në zonën e ish-kënetës, është ndër më të prekurit nga përmbytjet, dhe kjo ka çuar në futjen e ujrave në hapësirat ku ndodhen qelitë e të burgosurve.
Për shkak të situatës, të burgosurit në katin e parë janë detyruar të zhvendosen në katin e dytë. Një prej të burgosurve me shtetësi amerikane ka ngritur shqetësimin se shpërthimi i ujrave të ndotura përbën rrezik për shpërthimin e sëmundjeve infektive mes të burgosurve.
Kanalizimi i ujrave të zeza kalon pranë burgut dhe rreshjet e shiut kanë shkaktuar shpërthimin e tij, duke rënduar situatën. Zona e ish-kënetës mbetet një nga më problematiket në Durrës për sa i përket përmbytjeve.
