“Delta Air Lines” ka njoftuar se do të ofrojë një kompensim prej 30 mijë dollarësh për secilin pasagjer të avionit që u përmbys gjatë uljes në aeroportin Pearson në Toronto, pas një incidenti të rëndë ajror.
Avioni, që transportonte gjithsej 80 pasagjerë, përjetoi një eksperiencë traumatike, pasi erërat e forta shkaktuan përmbysjen e tij dhe një pjesë e tij u kapluar nga flakët. Megjithatë, të gjithë pasagjerët arritën të mbijetojnë dhe nuk pati viktima.
Kompensimi prej 30 mijë dollarësh do të ndihmojë pasagjerët të përballojnë shpenzimet e menjëhershme që mund të kenë lindur pas incidentit, si për trajtime mjekësore, transport dhe akomodim. Përfaqësues të Delta theksuan se ky kompensim ofrohet pa kushte dhe nuk ndikon në të drejtat e pasagjerëve, duke siguruar se kompania nuk po kufizon mundësinë për kërkesa të tjera kompensimi në të ardhmen.
