Shërbimi postar i Danimarkës, PostNord, ka njoftuar se do të dorëzojë letrën e tij të fundit më 30 dhjetor, duke i dhënë fund një tradite që daton mbi 400 vjet. Ky vendim vjen në kuadër të transformimit të kompanisë, e cila ka qenë rezultat i bashkimit të shërbimeve postare suedeze dhe daneze më 2009-n.
PostNord ka njoftuar gjithashtu se do të shkurtojë rreth 1.500 vende pune dhe do të heqë 1.500 kuti postare të kuqe në Danimarkë, duke e justifikuar këtë me rritjen e digjitalizimit në shoqërinë daneze. Dërgesat e letrave kanë rënë me më shumë se 90% gjatë 25 viteve të fundit, ndërsa kërkesa për dërgimin e pakove është rritur ndjeshëm. Në këtë kontekst, u shfaq një interes i madh për blerjen e kutive postare, me 1.000 prej tyre që u shitën brenda tre orëve në çmime nga 1.500 deri në 2.000 korona daneze. Një tjetër grup prej 200 kutish do të dalë në ankand në janar.
Megjithatë, dërgimi i letrave nuk do të ndalojë plotësisht. Kompania Dao planifikon të zgjasë shërbimet e saj, duke rritur volumin e letrave të dorëzuara nga 30 milionë në 80 milionë në vit, duke i kërkuar klientëve që t’i dorëzojnë letrat në pikat e saj ose të paguajnë për mbledhje në shtëpi. Sipas ligjit danez, duhet të ekzistojë mundësia për të dërguar letra, çka do të thotë se nëse Dao ndalon shërbimin e saj, qeveria do të duhet të gjejë një operator tjetër.
Ndërsa autoritetet theksojnë se kjo ndryshim do të jetë më shumë simbolik për qytetarët, ekspertët paralajmërojnë se varësia nga komunikimi digjital e bën të vështirë kthimin mbrapa. Megjithatë, është e dukshme se mes rinisë po rikthehet interesa për dërgimin e letrave fizike si një formë të veçante komunikimi.
Zëvendësdrejtori ekzekutiv i PostNord Danimarkë, Kim Pedersen, e ka përshkruar këtë ndryshim si të dhimbshëm por të pashmangshëm, duke e lidhur atë me orientimin gjithnjë e më të madh drejt digjitalizimit të danezëve.
