Ditën e sotme u mblodh Sekretariati i Etikës, i cili shqyrtoi kërkesën e Partisë Socialiste për përjashtimin e deputetëve të opozitës, pas incidenteve të rënda të ndodhura gjatë seancës plenare të 18 dhjetorit 2025.
Në mbledhjen e sotme, sekretariati i Etikës vendosi të marrë masa vetëm për 6 deputetë, ndaj të cilëve ishte kërkuar përjashtim me 30 dhe 60 ditë.
Pas tërheqjes për vendim, kryetari i Sekretariatit të Etikës, Ulsi Manja, njoftoi se është vendosur përjashtimi me 30 ditë nga seancat plenare dhe komisionet parlamentare për sjellje jo etike i deputetëve Belind Këlliçi, Fidel Kreka, Albana Vokshi, Klevis Balliu, Flamur Noka dhe Elda Hoti.
Ndërkohë, për 23 deputetë të tjerë, nuk u vendos përjashtim nga seancat plenare, por tërheqje vëmendje për sjellen e tyre në Kuvend.
Ulsi Manja: Kjo ishte mbledhja e dytë e këtij sekretariati. Në mbledhjen e parë vendosëm që sot, në orën 10:00 të shikonim pamjet e seancës së datës 18 dhjetor. Ka qenë një seancë jo normale, me veprime të dhunshme dhe sot erdhëm u mblodhëm për të dhënë edhe masat përkatëse. Në përfundim Sekretariati për Procedurat, Votimet dhe Etikën vendosi që vetëm për 6 deputetë nga ata që u propozuan për masë, të përjashtohen me 30 ditë pune. U propozua 60 ditë, por u vendos të përjashtohen me 30 ditë. Të gjithë deputetët e tjerë, për të cilët u prozuan të merren masa të përjashtimit 30 ditë dhe 10 ditë, Sekretariati për Procedurat, Etikën dhe Votimin vendoi që këtë radhë të mjaftohet vetëm me tërheqjen e vëmendjes për këta deputetë.
