TIRANË – Mbyllet rinumërimi i votave për qarkun e Fierit, teksa pritet të nisë edhe rinumërimi për Durrësin. Sipas informacionit zyrtar të KQZ, në Pallatin e Sportit “Farie Hoti” në Tiranë, janë hapur 586 kuti në total (përfundoi në orën 15:30). Rezultatet e deritanishme kanë treguar gabime në shifra si në votat për partitë, por më së shumti për kandidatët, ku në disa prej tyre ka devijime të shumta.
Zegjine Çaushi humbi mandatin për 10 vota ndaj rivales së saj Maldrita Bardho, aty ku ishte edhe gara më e fortë brenda PS-së. Çaushit nga rinumërimi iu hoqën 48 vota, kurse Bardhos iu shtuan 26 vota. Diferenca mes tyre nga numërimi i mëparshëm ishte me 64 vota diferencë në favor të Çaushit.
PD ka humbur 147 vota që i kishte marrë pa meritë, ndërsa PS-së i janë shtuar 30 vota që ia kanë hequr nga numërimi fillestar. Me këtë trend, Nisma Shqipëria Bëhet e Adriatik Lapajt nuk ka asnjë mundësi që t’i marrë mandatin PS-së. Asaj i duheshin 519 vota për të futur në kuvend kandidatin Azmer Duleviç. Rinumërimi nuk i ka dhënë asnjë përparësi, pasi koalicionit të Lapajt i janë hequr 8 vota që i ka marrë pa meritë.
Sa i përket partive të tjera kanë humbje të vogla. Lëvizjes Bashkë i janë zbritur 12 vota, Koalicionit Djathtas për Zhvillim i zbritet 3 vota, ndërsa PSD-së së Tom Doshit i shtohen 8 vota që i janë hequr më 11 maj.
Lëvizja më e madhe e votave është bërë te kandidatët, teksa u mbyll edhe rinumërimi në këtë proces.
Te socialistët, Ceno Klosi rezulton me numrin më të lartë të votave të pamerituara, me 830 deri më tani, të cilat i zbriten nga rezultati fillestar. Kandidatit tjetër Klevis Jahaj i shtohen 498 vota që i janë hequr nga numërimi i parë.
Në PD, edhe pse 4 deputetët e dalë janë të listës së mbyllur, janë evidentuar humbje të konsiderueshme. Silva Hasaj është kandidatja me më shumë vota të pamerituara, 671 vota, ndjekur nga Gentian Çela me 192 vota.
