Zgjedhjet e 12 majit kanë përfunduar në Bashkinë e Vlorës me një rezultat të thellë në favor të Partisë Socialiste. Nga 232 kutitë e votimit të numëruara, PS ka marrë 29,499 vota, duke siguruar 59.43% të totalit dhe duke konfirmuar dominimin e saj në këtë bashki strategjike të jugut.
Partia Demokratike dhe Aleanca për Shqipërinë Madhështore, të garuara në një koalicion të përbashkët, janë renditur të dytët me 12,521 vota, që përbëjnë 25.23% të rezultatit – një diferencë që përforcon fitoren e socialistëve në këtë zonë.
Forcat e tjera politike kanë mbetur larg në renditje:
- Partia Mundësia ka marrë 7.40% të votave (3,671 vota),
- Koalicioni Nisma Shqipëria Bëhet, i udhëhequr nga Adriatik Lapaj, ka arritur 3.92% (1,947 vota),
- Ndërsa subjektet e tjera si Lëvizja Bashkë, Koalicioni Euroatlantik, PSD dhe parti të vogla të spektrit të djathtë kanë marrë më pak se 2% secila.
Rezultatet në Bashkinë e Vlorës pasqyrojnë një mbështetje të fortë për Partinë Socialiste, që ndihmon në konsolidimin e fitores së saj në rang qarku. Ndërkohë, për Lapajn dhe formacione të tjera të reja politike, gara në këtë zonë ka qenë më sfiduese.
