Përfaqësues të Ministrisë së Brendshme dhe Drejtues të lartë të Drejtorisë së Policisë Qarku Vlorë, kanë mbërritur në Komisariatin e Sarandës në një mbledhje urgjente me drejtues të saj. Në fokus të takimit ka qenë analiza e situatës të ngjarjeve të fundit në Sarandë e Ksamil.
Gjithashtu mësohet se gjatë orëve të para të mëngjesit, forcat RENEA në bashkëpunim me FNSH dhe repartin “Shqiponja”, kanë zhvilluar kontrolle nga toka dhe deti në një sipërfaqe të gjerë. Kontrolle janë ushtruar nëpër male, tunele e bunkerë të braktisur, por pa rezultat.
Kujtojmë se në Ksamil pati sherr me sende të forta mes dy sipërmarrësve për përdorimin e një hapësire publike në zonën e plazhit.
Ndërsa në Sarandë, në qytet, ndodhi një plagosje e dyfishtë me armë pas një konflikti mes dy grupeve. Për shkak të kësaj plagosje të javës së kaluar, mesnatën e sotme ndodhi një shpërthim me eksploziv ndaj makinës së njërit prej personave që akuzohet për plagosjen, ende në arrati.
Mjeti që u hodh në erë është në pronësi të Klaus Jaçaj 31 vjeç, i cili akuzohet për përkrahje të autorëve të krimit, pasi ka ndihmuar dy autorët e dyshuar Ramadan dhe Erjon Canaj, të cilët qëlluan 2 të rinj pas konfliktit mes tyre.
