Ardhja e Kylian Mbappe te Real Madrid ka rezultuar një lëvizje e suksesshme dhe Florentino Perez nuk e fsheh kënaqësinë e tij me paraqitjet e yllit francez. Presidenti i Real Madrid ka ndjekur nga afër evolucionin e sulmuesit francez në ndeshjet e fundit dhe është i kënaqur me aftësinë e tij për t’u përshtatur me një rol të ri brenda ekipit.
Në ndeshjen e fundit kundër Girona-s, megjithëse Mbappe nuk shënoi, ai bëri një paraqitje të shkëlqyer duke treguar shkathtësinë e tij në asistin që dha për Vinicius. Aftësia e Mbappe për të lëvizur nëpër fushë, për të krijuar mundësi dhe për të ndihmuar shokët e skuadrës e ka befasuar për mirë presidentin e “Los Blancos”.
Sipas mediave vendase, pas ndeshjes ndaj Girona-s, Florentino Perez i tha Carlo Ancelottit: Ne kemi nënshkruar me Benzema-n e ri”, duke theksuar rritjen e Mbappe si një sulmues i kompletuar i aftë për të bërë shumë më tepër sesa thjesht të shënojë gola.
Me 28 gola dhe 6 asiste në 39 ndeshje, sulmuesi francez vazhdon të lërë gjurmë në sezonin e tij të parë me Real Madridin. Ambicia e tij për t’u përmirësuar është evidente dhe klubi është i sigurt se ai është i destinuar të bëjë histori, njësoj siç bëri “patrioti” i tij, Karim Benzema.
