Momente paniku kanë kaluar nxënësit dhe stafi i kolegjit privat “Turgut Ozal” pasi u përhap për një alarm për bombë.
Në ambientet e shkollë mbërritën forcat xheniere për të verifikuar se ku ndodhej bomba, ndërsa nxënësit dhe stafi u evakuan nga ambienti i kolegjit.
Policia eShtetit ka dalë më një njoftim zyrtar ku sqaron se bëhet fjalë për një alarm të rremë.
Ka qenë një e-mail i shkruar në anglisht në të cilin thuhej se në ambientet e shkollës ishte vendosur një bombë, e cila do të shpërthente për 43 minuta.
“Ju informojmë se në shkollë është dërguar një email dhe duhet që nxënësit të largohen për në shtëpi. Po bashkëpunojmë me policinë. Nuk ka panik dhe të gjithë fëmijët janë shumë mirë! Transporti i fëmijëve do të jetë me furgon ose nga ana e prindërve nëse ka mundësi. Do mbetemi në kontakt. Mësuesja kujdestare”, shkruhet në mesazhin që iu është dërguar prindërve nga stafi i Kolegit “Turgut Ozal”.
Pas këtij emaili është njoftuar policia, të cilët së bashku me Njësia Antieksploziv kanë shkuar menjëherë në vendngjarje ku kanë bërë evakuimin e nxënësve dhe stafit të shkollës.
Pas kontrollit në të gjithë ambientin e kolegjit, ka rezultuar se ishte një alarm i rremë.
Njoftimi i plotë i policisë:
Më datë 21.02.2025, rreth orës 11:30, është marrë njoftim se në adresën e një shkolle private në zonën e Misto-Mames, ka ardhur e-mail i shkruar anglisht në të cilin thuhej se në ambientet e shkollës ishte vendosur një bombë, e cila do të shpërthente për 43 minuta.
Shërbimet e Policisë dhe Njësia Antieksploziv kanë shkuar menjëherë në vendngjarje ku kanë bërë evakuimin e nxënësve dhe stafit të shkollës.
Vijon kryerja e kontrollit dhe verifikimeve përkatëse nëse njoftimi është i rremë.
Shërbimet e Policisë, strukturat e Antiterrorit në bashkëpunim me specialistët për Hetimin e Krimit Kibernetik po punojnë për sqarimin e rrethanave dhe identifikimin e autorëve.
