Milan ka arritur marrëveshjen me Besiktas për transferimin e Emerson Royal në formë huazimi për një sezon, me të drejtë blerjeje për 10 milionë euro. Pas largimit të brazilianit, një tjetër largim pritet nga Milan të zyrtarizohet po këto ditë.
Bëhet fjalë për Ismael Bennacer, algjeriani i rikthyer te kuqezinjtë pas huazimit te Olimpique Marseille, por klubi francez nuk ushtroi të drejtën për blerjen e kartonit të tij. E ardhmja e Bennacer, i cili po ashtu nuk bën pjesë në projektin e Max Allegri-t do jetë në Arabinë Saudite.
Sipas mediave italiane, Al-Ittihad ka rënë dakord për kushtet personale me mesfushorin dhe tani ka mbetur vetëm marrëveshja me Milanin. Igli Tare është duke punuar për detajet e fundit të shitjes së Bennacer, i cili u transferua te Milan në vitin 2019 nga Empoli për 17 milionë euro dhe ka luajtur në 178 ndeshje me kuqezinjtë, ku ka shënuar 8 gola dhe ka dhënë 12 asiste, shumë larg pritshmërive ndaj tij.
