Pas ekstradimit nga Spanja, ish kreu i Bandës së Durrësit, Lulzim Berisha është vendosur në burgun e qytetit bregdetar.
Burime për mediat bëjnë me dije se ai është zhvendosur në ambientet e burgut në Durrës për të vuajtur pjesën e mbetur të dënimit.
Lulzim Berisha ose i njohur nga të gjithë si ish-kreu i Bandës së Durrës u ekstradua nga Spanja në Shqipëri më 18 mars. Me kërkesë të Prokurorisë së Posaçme, Berisha i cili akuzohet për vrasjen e Klodian Saliut u soll në vendim tonë në masa të rrepta sigurie.
Ndërkohë dy ditë më pas, më 20 mars, GJKKO la në fuqi masën “arrest me burg” për të shumëkërkuarin e drejtësisë.
Ai mohoi në Gjykatë njohjen dhe akuzat e bashkëpunëtorit të drejtësisë Luftar Reçi.
“Nuk e njoh fare atë njeri, nuk e kam takuar asnjëherë. Nëse më provoni një kontakt më dënoni sa të doni. Njëlloj siç më ra akuza tjetër, njëlloj do të bjerë edhe kjo“, dëshmoi ai.
Kujtojmë se Berisha dhe i cilësuar si person më rrezikshmëri të lartë, u arrestua në dhjetor të vitit 2023 nga policia spanjolle.
Ai u pikas nga policia spanjolle, ndonëse kishte ndryshuar pamjen fizike. Me syze leximi dhe tatuazhe si dhe kamuflohej me një pasaportë të falsifikuar bullgare. “Bosi” i Durrësit u arrestua teksa ishte duke qëndruar në një stol prej druri.
Asokohe Policia e shtetit njoftoi se Berisha, ish kreu i bandës së Durrësit dhe një ndër kriminelët më të rrezikshëm u kap nga autoritetet spanjolle, në kuadër të operacionit të përbashkët “Sant Joan” mes policisë shqiptare dhe asaj spanjolle.
Lulzim Berisha, i njohur ndryshe si Lul Berisha aktualisht është duke u gjykuar nga GJKKO për veprën penale të vrasjes së kryer në kuadër të grupit të strukturuar kriminale, që ka të bëjë me ekzekutimin e rivalit të tij përbetuar Klodian Saliut.
Akuzë e ngritur ndaj Berishës ka ardhur pas rrëfimit të Luftar Reçit, “pentitos” së drejtësisë. Por, sipas asaj që Prokuroria e Posaçme ka bërë me dije më herët, ka të tjera prova të cilat inkriminojnë Berishën në këtë ngjarje.
