Jared Kushner, dhëndri i presidentit amerikan Donald Trump, ka vendosur të tërheqë investimin e tij në një projekt ndërtimi hoteli në Beograd, sipas raportimeve të Wall Street Journal. Ky projekt ishte planifikuar të zhvillohej në vendin e ish-godinës së Shtabit të Përgjithshëm të Ushtrisë së Jugosllavisë, e cila u shkatërrua gjatë bombardimeve të NATO-s në vitin 1999. Kompania e Kushnerit, “Affinity Partners”, kishte menduar të ndërtonte një hotel luksoz aty.
Lajmi i tërheqjes vjen në një moment të tensionuar, pasi Prokuroria Publike për Krim të Organizuar në Serbi ka ngritur aktakuzë ndaj ministrit të Kulturës, Nikolla Sellakoviq, për abuzim në procesin e heqjes së statusit të pronësisë kulturore të kësaj ndërtese. Ai përballet me akuzat për keqpërdorim të detyrës dhe falsifikim dokumentesh. Një zëdhënës i kompanisë së Kushnerit ka theksuar se kanë vendosur të tërhiqen për të shmangur ndarjen e qytetarëve të Serbisë dhe për të respektuar ata.
Hetimet për këtë rast kanë filluar që nga maji, dhe akuzat e prokurorisë sugjerojnë se dokumentet e falsifikuara luajtën një rol kljuç në marrjen e vendimit për heqjen e statusit të pronësisë. Më herët, akuza e prokurorisë përfshinte drejtorin e Institutit Republikan për Mbrojtjen e Monumenteve të Kulturës, i cili pranoi se kishte marrë pjesë në falsifikim.
Në mes të këtyre ngjarjeve, presidenti serb Aleksandar Vuçiq ka sugjeruar se do të falë ata të akuzuar nëse ka ndonjë procedurë ligjore, duke e marrë përgjegjësinë për modernizimin e vendit. Më 11 dhjetor, ai njoftoi se kërkonte investime dhe se dëshironte të sjellë investitorë të mëdhenj në Serbi.
Përveç projektit në Beograd, Kushner ka plane të tjera në Shqipëri, duke përfshirë transformimin e Ishullit të Sazanit në një kompleksh luksoz. Ky investim, vlerësuar në 1.4 miliard euro, ka për synim krijimin e rreth 1,000 vendeve të punës, ndonëse ende nuk ka detaje të qarta mbi statusin e tij ligjor.
