Këngëtarja e njohur Sia ka fituar një betejë të rëndësishme ligjore ndaj ish-bashkëshortit të saj, Daniel Bernardo, lidhur me kujdestarinë e djalit të tyre të vogël, njëvjeçar. Gjykata në Los Angeles e hodhi poshtë kërkesën e tij për kujdestari të plotë, e cila bazohej në akuzat për abuzim me drogë ndaj Sias, e cila është 49 vjeçe.
Sipas raportimeve nga Daily Mail, Bernardo pretendoi se Sia ishte një “rrezik serioz dhe të menjëhershëm” për djalin e tyre, duke e përshkruar si një nënë të papërshtatshme me probleme të varësisë. Ai kërkoi gjithashtu pagesa mujore prej 77,245 dollarësh për mbështetje financiare. Mirëpo, gjykata nuk pranoi kërkesën e tij urgjente, duke u mbështetur në argumentet e avokates së Sias, Laura Wasser, e cila tha se Bernardo nuk kishte paraqitur prova të reja që justifikonin ndryshimin e marrëveshjes aktuale për kujdestarinë.
Aktualisht, Sia ka kujdestarinë kryesore të djalit, ndërsa Bernardo ka të drejtën për vizita të mbikëqyrura. Sia e ka mbrojtur veten duke thënë se akuzat e Bernardo-s janë “krejtësisht të pabaza dhe mashtruese”. Ajo ka theksuar se është e pastër prej gjashtë muajsh dhe ndjek një program rehabilitimi që përfshin testime të rregullta për substancat.
Në dokumentet e gjykatës, Bernardo foli për “sjellje të pamatur dhe të rrezikshme” nga ana e Sias, ndërsa ajo u shpreh se kishte ofruar të testohej për substancat, por ai kishte refuzuar këtë propozim. Kjo situatë nënvizon tensionet mes çiftit, të cilat filluan pas shpalljes së divorcit nga Sia në mars të vitit të kaluar pas dy vitesh martesë.
Përfundimisht, vendimi i gjykatës për të hedhur poshtë kërkesën e Bernardo-s për kujdestari të plotë për djalin shënon një fitore për Sian në këtë betejë ligjore dhe konfirmon rolin e saj si kujdestare kryesore.
