Majlisi, Parlamenti i Teheranit në Iran është dakordësuar mbylljen e ngushticës së Hormuzit, një nga pikat më strategjike për tregtinë ndërkombëtare të naftës dhe gazit të lëngshëm natyror.
Gjithsesi, gjenerali i Gardës së Revolucionit, Esmail Kowsari, i cili është anëtar i Komisionit për Sigurinë Kombëtare në Majlis, është shprehur se vendimi përfundimtar i takon Këshillit të Lartë të Sigurisë Kombëtare.Ngushtica e Hormuzit, si një “korridor detar” midis Iranit dhe Omanit, lidh Gjirin Persik me Gjirin e Omanit dhe Detin Arabik. Ajo përshkohet çdo ditë nga rreth 17 milionë fuçi naftë, që përfaqëson më shumë se 20% të konsumit ditor global. Mbyllja e saj konsiderohet një akt me pasoja të rënda ekonomike dhe gjeopolitike.
Menjëherë pas njoftimit, tregjet ndërkombëtare reaguan me rritje të ndjeshme të çmimeve të naftës, duke kapur nivelet më të larta të muajve të fundit. Analistët paralajmërojnë një krizë energjetike që mund të preki sidomos vendet importuese si Japonia, India dhe shtetet europiane, të cilat varen nga nafta e Gjirit Persik.
Mbyllja e ngushticës shihet si një hap i rrezikshëm që mund të ndezë një përshkallëzim më të gjerë të konfliktit në Lindjen e Mesme dhe të sjellë pasiguri të forta në ekonominë globale. Zhvillimet në orët e ardhshme do të jenë vendimtare për të kuptuar nëse bota po shkon drejt një konfrontimi të ri apo do të dominojë rruga e diplomacisë.
Raportohet se pas sulmeve amerikane ndaj objekteve iraniane, komponenti i “risk premium” (premiumi për rrezikun gjeopolitik) është shtuar ndjeshëm. Analistët parashikojnë një rritje të mëtejshme të çmimeve, duke e çuar Brent-in drejt niveleve prej 100–130 USD për fuçi në skenarin më ekstrem shihet si logjik.
Aktualisht, çmimet janë në 75–80 USD, por kjo varet nga zhvillimet e ardhshme në rajon: nëse Irani ndërhyn në tregtinë e naftës përmes ngushticës së Hormuzit, çmimet mund të kapërcejnë $100 .
