Një 39-vjeçar nga Kanina është arrestuar mbrëmjen e 1 qershorit në Vlorë, pasi kundërshtoi me dhunë punonjësit e policisë.
Ai kishte parkuar makinën gabimisht në lagjen “Hajro Çakërri”, duke bllokuar rrugën për automjetet dhe këmbësorët. Kur policia i kërkoi të largohej dhe i komunikoi masën administrative, ai reagoi dhunshëm ndaj efektivëve.
Pas incidentit, u arrestua në flagrancë dhe ndaj tij po hetohet për kundërshtim të punonjësve të rendit. Çështja i është referuar Prokurorisë së Vlorës për veprime të mëtejshme.
Njoftimi i policisë:
“Strukturat e Komisariatit të Policisë Vlorë, në bashkëpunim me oficerin e Policisë Gjyqësore në Prokurorinë e Rrethit Gjyqësor Vlorë, arrestuan në flagrancë shtetasin N. A., 39 vjeç, banues në fshatin Kaninë, Vlorë.
Ky shtetas, më datë 01.06.2025, rreth orës 21:00, në lagjen “Hajro Çakërri”, ka ndaluar dhe parkuar automjetin në kundërshtim me rregullat e qarkullimit rrugor, duke penguar lëvizjen e lirë të mjeteve dhe përdoruesve të tjerë të rrugës, në shkelje të dispozitave të parashikuara në Kodin Rrugor. Pasi i është komunikuar masa administrative për shkeljen, ky shtetas ka kundërshtuar me dhunë punonjësit e patrullës së përgjithshme, gjatë ushtrimit të detyrës.”
