Klubi Antique ka kritikuar publikisht këngëtarin Bardhi, duke e akuzuar për anulimin e një performance të planifikuar për shkak të një mosmarrëveshjeje financiare.
Sipas një postimi të ndarë nga klubi, Bardhi ishte planifikuar të performonte më 12 Tetor. Megjithatë, këngëtari dyshohet se e anuloi koncertin pasi iu ofrua një pagesë më e lartë për një aktivitet tjetër.
Klubi gjithashtu pretendon se ata kishin rezervuar tashmë biletat dhe hotelin për Bardhin, por menaxheri i tij i ri papritur anuloi performancën, duke përmendur si arsye që Bardhi “kishte humbur dokumentet e udhëtimit.”
Kjo situatë ka shkaktuar polemika, veçanërisht pas deklaratave të fundit të Bardhit për viktimizimin nga ish-menaxhmenti i tij.
Postimi i Klubit Antique:
“Ky artisti që para 3 dite u viktimizojke në kang që kinse ish-menaxhmenti po ja anulon koncertet po del e kundërta, ai po merka vesh me njerëz për me performu dikun dhe masanej veç pse po ja ofrojka dikush 500€ ma shumë po i anulojka datat e mara.
Unë personalisht jom marrë vesh me menaxherin e tij të ri që Bardhi me performu më 12 Tetor në Antique tek une dhe pasi kom bo publicitet të shumtë dhe pasi jau kom rezervu biletat dhe hotelin, ma kanë anulu mbramjen me pretekstin kinse Bardhi i ka humb dokumentat e udhëtimit.
Mua më mashtruat por mos mashtroni të tjerë se marr!”
