Lëkundjet e njëpasnjëshme që kanë goditur Santorinin ditët e fundit kanë shkaktuar frikë tek banorët dhe turistët, duke çuar në largimin masiv të vizitorëve nga ishulli. Shkencëtarët e kanë përshkruar këtë situatë si një “valë” tërmetesh, ndërsa frika sa vjen e rritet.
Për të përballuar kërkesën e lartë për largime, linjat ajrore kanë shtuar dyfishin e fluturimeve nga Santorini drejt Athinës. Agjencitë e udhëtimit raportojnë se biletat për këto fluturime janë shitur në çast, duke treguar qartë ankthin e njerëzve për të mos qëndruar më gjatë në zonë.
Gjatë fundjavës, mbi 200 lëkundje janë ndjerë në ishull, ndërsa edhe gjatë natës tërmetet kanë vazhduar, duke detyruar shumë persona të kalojnë natën jashtë ose në automjetet e tyre. Lëkundja më e fuqishme, me magnitudë 4.8 të shkallës Rihter, u regjistrua të hënën në orën 14:17 sipas kohës lokale. Përveç tërmeteve, janë raportuar edhe rrëshqitje dheu dhe shkëmbinjsh.
Me urdhër të ministrisë së mbrojtjes civile të Greqisë, shkollat në Santorini dhe ishujt përreth Ios, Anafi dhe Amorgos do të qëndrojnë të mbyllura deri të premten, ndërsa njerëzit u këshilluan si masë paraprake për të shmangur ndërtesat e braktisura dhe grumbullimin në një numër të madh në hapësira të mbyllura.
Paralajmërimet janë lëshuar gjithashtu për të shmangur vijën bregdetare dhe porte të caktuara në rast se një tërmet shkaktonte një cunami.
“Duket se një linjë thyerjeje sizmike është aktivizuar dhe mund të shkaktojë një tërmet mbi gjashtë, në shkallën Rihter”, tha një tjetër sizmolog, Prof Manolis Skordylis, në radion publike. “Nuk e kemi pasur ende tërmetin kryesor.”
