Kamerat e sigurisë kanë filmuar dhunën brutale ndaj Adriatik Roshit në një berberhane në zonën e ish-Doganës në Tiranë, të dielën e 5 janarit 2025.
Adriatik Roshi, 48 vjeç, u dhunua në ambientet e një berberhane pranë zonës së ish-Doganës në Tiranë. Në pamjet e mëposhtme shihen persona, të maskuar dhe pajisur me sende të forta hyjnë brenda e godasin në pjesë të ndryshme të trupit, duke i sjell dëme të shumta.
Roshi ndodhet në spital në gjendje të rëndë, ndërsa agjentët e Komisariatit nr. 3 identifikuan në total 6 persona në kuadër të operacionit “Details”, të cilët organizuan, ruajtën dhe dhunuan 48-vjeçarin, 2 prej të cilëve u arrestuan.
Nga pamjet duket që dhunuesit kanë nëdorë sëpatë, levë, ndërsa njëri ka pistoletë.
Ngjarja
Biznesmeni Luçiano Koçeku dhe 5 anëtarë nga fisi i tij, akuzohen se dhunuan barbarisht një 48-vjeçar, si hakmarrje për sherrin masiv gushtin e 2024-ës në club Sin në Palasë gjatë kohës që performonte live këngëtari i njohur grek, Konstandinos Argiros.
Biznesmeni i njohur edhe si Tur Koçeku, i cili verën e kaluar mori lëndime të rënda në kokë bashkë me disa nga grupi i tij, 4 muaj më vonë, të dielën e 5 janarit, u organizua të dhunojnë një prej personave që policia në atë kohë nuk e kishte identifikuar në mesin e autorëve të dyshuar në resortin në jug.
