Deputeti i PD-së, Edi Paloka tha se, Berisha është i vetmi që nuk ka asnjë përgjegjësi për rezultatin e marrë me 11 maj. I ftuar në një intervistë në news 24, Paloka theksoi se në politikë s’ka vendime personale. Sipas tij, edhe sikur të mos ishte ajo farsë politike në 11 maj, Berisha është njeriu që e ngriti PD, duke e nxjerrë nga humnera ku ndodhej.
Teksa e ka cilësuar të drejtë, vendimin e Berishës për të mos hequr dorë nga drejtimi i PD, Paloka paralajmëroi për një moskandidim të tij në të ardhmen si deputet. Gjithashtu ai nënvizoi se do të jetë në PD duke pritur të shohë Ramën të rrëzohet nga pushteti.
“Pak muaj para zgjedhjeve, Berisha ishte në arrest shtëpie, PD nuk kishte financa dhe për 2 muaj ai e mori fushatën. E mbajti PD në krahë. Unë lodhesha duke parë takimet e Berishës, një 80 vjeçar që bënte nga 10 takime. E mori PD në krahë, e patë pritjen që i bënë kudo në Shqipëri. Të gjithë ne kemi përgjegjësi dhe ai jo.Çdo vendim që unë mund të marr në të ardhmen, ta shpjegoj, sigurisht unë marr vendime personale dhe jeta është e imja. Në politikë s’ka vendime personale. Nesër mund të mos hyj në asnjë kandidim, por nuk do iki nga politika. Do jem përballë Ramës dhe do jem aty kur do të ndodhë”, tha Paloka.
