Lezhë – Nën hetim kandidati për deputet i Partisë Demokratike, Gjin Gjoni, pas kallëzimit për kërkesë vote
Drejtoria Vendore e Policisë në Lezhë ka bërë me dije se Specialistët për Hetimin e Krimeve në Komisariatin e Lezhës kanë kryer veprimet procedurale dhe kanë referuar materialet hetimore në Prokurorinë pranë Gjykatës së Shkallës së Parë Lezhë, në lidhje me një kallëzim penal të depozituar së fundmi.
Sipas njoftimit zyrtar, kallëzimi është bërë nga shtetasi V. K., 66 vjeç, banues në Lezhë, i cili pretendon se kandidati për deputet i subjektit politik Partia Demokratike, Gjin Gjoni, 55 vjeç, i ka shkuar në banesë dhe i ka kërkuar votën në kuadër të zgjedhjeve të 11 majit.
Policia thekson se veprimet hetimore janë në fazë paraprake dhe se hetimi është në vijim për të sqaruar tërësisht rrethanat e rastit. Autoritetet nuk kanë dhënë më shumë detaje në këtë fazë për të mos cënuar procesin hetimor.
