Kryesocialisti Edi Rama gjatë fjalës së tij në takimin e fitores me kandidatët socialistë fitues dhe jo fitues të zgjedhjeve të 11 majit, është ndalur dhe te kundërshtari politik.
Rama tha se është për të ardhur keq kur sheh që sot opozita është marrë peng nga një plak 80-vjeçar i shpallur non-grata me vulë dhe me votë.
Ndërsa me ironi tha se nëse sot në krye të PD do të ishet Lulzim Basha, ata 200 mijë demokratë që refuzuan t’i votonin do të thoshte se kanë vdekur.
“Gara e brendshme solli një rendiment të lartë kolektiv, ndërsa madhështorët ranë me kokë. Gomari nuk do fluturonte dhe përtej asaj që shihej, kuptohej se ishte asgjë. Fatkeqësisht, dhe e them me keqardhje, politika shqiptare do vazhdojë të mbetet e tillë, e ndarë në dy universe paralele. Ky universi ynë që rritet hap pas hapi dhe duke ngritur shkallët drejt BE-së, do vazhdojë të pasqyrohet në media si një Shqipëri me grindje, vrasje…
Lajmi i mirë është që shumica nuk i beson më. Lajmi i keq është që kjo s’ka për të ndryshuar, deri kur të ndryshojë mënyra e të bërit opozitë. Për sa kohë opozita do jetë e kapur si një pulë qorre në kthetrat e një plaku, që s’ka lënë të zezë pa bërë dhe tani po bëhet e zeza për PD-në, s’do ketë një alternativë.
Ne votat tona i kemi marrë përsëri, ndërkohë që këto 200 mijë që mungojnë janë ata që qëndrojnë në shtëpi ose zgjodhën të ngushëllohen në ca alternativa të tjera. Po të ishte Luli do thoshte kanë vdekur.
Ndërkohë që këta të tjerët që i bie më gjatë do vazhdojnë të thonë që i kemi blerë ne, por llogaria nuk del përsëri. Gjithsesi kjo katandisje keq e më keq e asaj që nisi si parti e rinisë shqiptare dhe që është katandisur në uturaklun e një 80-vjeçari non grata me vulë e me votë. Nuk është as zgjidhja e as zgjedhja jonë. Na u desh të merremi gjatë zgjedhjeve, pro tani le t’i lëmë në llucën ku llokoçiten prej 12 vjetësh e do vazhdojnë të llokoçiten. Ne nuk duhet të humbasim më kohë me ta, përveç mureve të parlamentit”, tha Rama.
