Partia Demokratike do të mbledhë mesditën e kësaj të mërkure Kryesinë. Përmes një njoftimi zyrtar, selia blu bën me dije se mbledhja e Kryesisë do të nisë në orën 13:00, ku pritet që të diskutohet lidhur me vijueshmërinë e opozitën dhe hapat që do të ndërmerren sa i përket sesionit të ri parlamentar.
Do të jetë ish-kryeministri Sali Berisha ai i cili do të hapë mbledhjen e cila do të mbahet në sallën “Azem Hajdari”.
“Në orën 13:00, do të zhvillohet mbledhja e Kryesisë së Partisë Demokratike, ku do të ketë fjalën e tij drejtpërdrejt për media Kryetari i PD, Prof. Dr. Sali Berisha, salla “Azem Hajdari”, selia e PD”, thuhet në njoftimin e bërë nga Partia Demokratike.
Kjo mbledhje vjen dy ditë larg fillimit të sesionit të ri parlamentar, si dhe një ditë para Asamblesë së Partisë Socialiste ku dhe pritet që të njoftohet edhe kabineti i ri qeveritar “Rama 4”.
Sakaq demokratët nëpër studio televizive kanë pohuar se do të jetë Kryesia e partisë ajo e cila do të vendosë lidhur me format me të cilat do të vazhdojnë aksionin e tyre opozitar, por një prej skenarëve që qarkullon nëpër korridore është ajo e bojkotit të seancave plenare.
