Oficerët e Agjencisë Kombëtare të Krimit (NCA) në Britaninë e Madhe kanë realizuar një operacion të gjerë në Birmingham dhe Dudley, i cili ka rezultat në shkatërrimin e disa “shtëpive bari” dhe sekuestrimin e sasi të konsiderueshme droge dhe parave cash. Ky operacion ishte pjesë e një hetimi më të gjerë për krimin e organizuar dhe emigracionin ilegal.
Sipas raportimeve nga NCA, gjatë një bastisjeje në Corser Street, Dudley, oficerët gjetën rreth 80 bimë kanabisi, me një vlerë përafërsisht 80 mijë paund. Në kuadër të këtij operacioni, u arrestuan gjithsej gjashtë individë në disa adresa në Birmingham. Një 34-vjeçar shqiptar u ndalua në Cornbrook Road, së bashku me dy të tjerë, një 29-vjeçare dhe një 21-vjeçar, për shkelje të ligjit të emigracionit. Po ashtu, në këtë shtëpi, oficerët sekuestruan rreth 50 mijë paund cash dhe 20 kilogramë kanabis që ndodheshin në papafingo.
Në një tjetër lokacion në Fountain Road, një 31-vjeçar u arrestua për kultivimin e kanabisit, konspiracion për shpërndarjen e narkotikëve dhe pastrim parash, siç dyshohet se kishte lidhje me shqiptarin e ndaluar më parë. Një zbulim më i rëndësishëm u bë në Warstone Lane, ku oficerët gjetën dy kilogramë kokainë. Dy të rinj, të moshës 23 dhe 25 vjeç, u arrestuan për posedimin e drogës së klasit A me qëllim shitje.
Në një adresë tjetër në Pumphouse Way, u zbuluan pajisje për kultivimin e drogës në një kasolle, ku për fat nuk kishte persona të pranishëm. Saju Sasikumar, kreu i degës së NCA-së, theksoi se kultivimi i kanabisit dhe krimi i emigracionit janë shpesh të lidhur, duke përshkruar si viktimat shfrytëzohen dhe detyrohen të punojnë për të shlyer borxhet e udhëtimit. Ai e vlerësoi operacionin si një goditje të rëndësishme për grupet kriminale dhe rrjetet e shpërndarjes. Ky operacion u realizua në bashkëpunim me Policinë e West Midlands, përkatësisht Njësinë për Luftën kundër Kanabisit.
