Policia e Korçës ka finalizuar një tjetër fazë të operacionit policor të koduar “The Wanted”, duke arrestuar tre shtetas të shpallur në kërkim, të cilët ishin pjesë e një grupi kriminal që merrej me shpërndarjen e drogave të forta në qytet.
Të arrestuarit rezultojnë të jenë të dënuar secili me mbi 7 vjet burgim për veprën penale “Prodhimi dhe shitja e narkotikëve”, ndërsa ishin në kërkim në kuadër të operacionit të mëparshëm “Knock Down 2”.
Operacioni u zhvillua nga specialistët për Hetimin e Narkotikëve në bashkëpunim me shërbimet e Forcës së Posaçme “Shqiponja”, bazuar në të dhëna operative dhe informacione të siguruara në rrugë konfidenciale.
Të arrestuarit janë:
J. Xh., 29 vjeç, banues në Korçë – i dënuar me 7 vjet burgim, nga të cilat i mbeten për të vuajtur 2 vjet, 10 muaj e 15 ditë;
P.K., 34 vjeç, banues në Korçë – i dënuar me 7 vjet e 6 muaj burgim, me 2 vjet, 1 muaj e 16 ditë të pashlyera;
E.C., 35 vjeç, banues në Korçë – i dënuar me 8 vjet burgim, nga të cilat i mbeten 3 vjet, 4 muaj e 20 ditë.
Të tre shtetasit ishin shpallur në kërkim pas veprimtarive të tyre kriminale në fushën e narkotikëve dhe u lokalizuan në qytetin e Korçës.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme ligjore.
