Operacioni policor i koduar “Metalurgjiku” përfundoi me sukses pas disa muajsh hetimi të thelluar, i realizuar në bashkëpunim me Prokurorinë, për të goditur krimet mjedisore. Ky aksion çoi në procedimin penal të dy subjekteve juridike, të cilat ishin angazhuar në aktivitete të paligjshme të përpunimit të mbetjeve dhe prodhimit të ferrokromit, duke shkaktuar ndotje të konsiderueshme të mjedisit.
Në përfundim të operacionit, Policia arrestoi 16 individë, përfshirë 9 shtetas të huaj, që mbulonin role të ndryshme menaxheriale dhe teknike në këto struktura. Mes të arrestuarve ishin J. C. dhe E. F., administratorë, si dhe disa inxhinierë dhe punonjës të tjerë, duke përfshirë shtetas indianë dhe nepalezë. Në përfundim të hetimeve, u shpallën në kërkim 8 aksionerë, të cilët ishin ende në arrati.
Hetimet e zhvilluara nga Drejtoria Vendore e Policisë në Elbasan, në bashkëpunim me Inspektoratin Kombëtar të Mbrojtjes së Territorit, zbuluan shkelje të konsiderueshme të legjislacionit ambientor nga dy subjekte tregtare në zonën e ish-Metalurgjikut në Bradashesh. Këto subjekte ishin përgjegjëse për ndotjen e ajrit, ujërave dhe tokës, si dhe për mosrespektimin e regulave lidhur me menaxhimin e integruar të mbetjeve.
Si rezultat i shkeljeve, u vendosën masa administrative, duke përfshirë gjobë prej 3 milion lekësh për një nga subjektet dhe 10 milion lekë për tjetri. Aktivitetet e të dy subjekteve u pezulluan deri në përmbushjen e kushteve ligjore. Gjithashtu, u sekuestruan celularë dhe regjistrues për të mbledhur prova për vazhdimin e hetimeve.
Materialet procedurale janë dërguar në Prokurorinë e Elbasanit për veprime të mëtejshme, dhe punonjësit e zyrave qeveritare, përfshirë shefin e sektorit të mjedisit në Bashkinë Elbasan, përballen me akuza për shpërdorim detyre dhe falsifikim dokumentesh. Hetimet vazhdojnë për identifikimin dhe kapjen e individëve të shpallur në kërkim.
