Organizata e Kombeve të Bashkuara ka njoftuar se ekipet e saj në Gaza ende nuk kanë mundur shpërndarjen e ndihmave humanitare, pavarësisht hyrjes së dhjetëra kamionëve me furnizime në territorin palestinez gjatë dy ditëve të fundit.
Zyrtarët izraelitë konfirmuan se 93 kamionë arritën ditën e djeshme në Gaza, duke transportuar një gamë të gjerë ndihmash, përfshirë miell, ushqim për fëmijë, pajisje mjekësore dhe ilaçe farmaceutike.
Megjithatë, OKB është shprehur se pavarësisht arritjes së kamionëve në anën palestineze të pikës kufitare Kerem Shalom, shpërndarja e këtyre ndihmave nuk ka nisur ende.
Izraeli kishte rënë dakord të dielën për të lejuar hyrjen e një sasie bazë ushqimi në Gaza, ku ekspertët ndërkombëtarë kanë paralajmëruar për një krizë ushqimore të mundshme, ndërsa situata humanitare po përkeqësohet me kalimin e ditëve.
