Ministrja e Arsimit dhe Sportit, Ogerta Manastirliu, e cilësoi si shumë frytdhënës takimin e zhvilluar sot në Tiranë me të rinj e të reja, ku u diskutuan ide dhe projekte inovative në fushën e startup-eve.
“Ju jeni dëshmi konkrete e punës që po bëjmë në mbështetje të të rinjve dhe studentëve. Politikat tona kanë synuar pikërisht nxitjen e inovacionit, teknologjisë dhe investimeve në arsim dhe punësim për të rinjtë,” u shpreh Manastirliu gjatë aktivitetit “Vizioni i të rinjve Shqipëria 2030”.
Manastirliu bëri të ditur se deri më sot janë investuar 450 shkolla me laboratorë dhe infrastrukturë moderne, ndërsa 340 laboratorë janë tashmë funksionalë. Deri në vitin 2026, synohet që 1,000 shkolla të pajisen me laboratorë inteligjentë për të mbështetur zhvillimin teknologjik.
“Sot, 35 mijë nxënës nga klasat e para deri në të tretat janë pjesë e programit të kodimit dhe teknologjisë digjitale. Po ashtu, 25 laboratorë të inteligjencës artificiale janë në funksion dhe u japin mundësi të rinjve të futen në botën e programimit,” tha ajo, duke shtuar se çdo vit rreth 50 mijë studentë përfitojnë nga bursa, tarifa të reduktuara dhe programe të ndërkombëtarizimit të universiteteve që po ecin me ritme të shpejta.
