Kryetari i Grupit Parlamentar të Partisë Demokratike, Gazment Bardhi ka “shpërthyer” në akuza ndaj përfaqësuesve të mazhorancës.
Gjatë mbledhjes së Konferencës së Kryetarëve, demokrati ka akuzuar kryetarin e Kuvendit, Niko Peleshin, për shkelje të procedurave parlamentare dhe për favorizim të shumicës, duke shtuar se po e mbyll Kuvendin në mënyrë të paligjshme.
“Ajo çfarë keni bërë me seancën e fundit është shkelje e Rregullores dhe e Kushtetutës. Nuk mund të mbyllni Kuvendin pse deputetët po flasin. Seanca e datës 9 tetor është mbyllur në mënyrë të njëanshme. Në atë Kuvend ka deputetë që forcën e marrin nga krimi i organizuar dhe mendojnë se mund të mbyllin gojën e të tjerëve. Ta harrojnë!”, u shpreh Bardhi.
Ai akuzoi Peleshi se nuk po garanton funksionimin demokratik të Kuvendit dhe po vepron nën diktatin e mazhorancës.
“Nëse Kuvendi drejtohet nga kryetari i grupit, na e thoni, sepse opozita nuk ka vend në një Kuvend që diktohet nga forcat e kartonëve. Nëse nuk e mbani dot atë karrige, lërojani kryetarit të grupit që e keni aty me votat e krimit të organizuar”, shtoi ai.
Ndërkohë që burime për Newsbomb bëjnë me dije se debatet në sallë u përshkallëzuan në momentin kur Bardhi iu drejtua kreut të grupit të Partisë Socialiste, Taulant Ballës, duke e akuzuar për lidhje me persona të botës së krimit.
“Ke komunikime me Suel Çelën”, mësohet t’i ketë thënë Bardhi, ndërkohë që në replikë Balla reagoi duke përdorur fjalë jo adekuatë për një ligjvënës: “Ik ore pirdhu”.
Bardhi nuk u përmbajt dhe iu kthye: “Pirdhu ti, i paedukatë. Ke fjalor rruge. Ça je ti mo, kush je ti? Ti je zar i Suel Çelës e na jep ne leksione etike. Ti do shkosh në burg, do shkosh në burg!”
