Shefi i njohur turk dhe fenomeni i rrjeteve sociale, Nusret Gökçe, i famshëm me nofkën “Salt Bae”, ka postuar në Instagram një fotografi me kryeministrin Edi Rama, të cilin e ka përshkruar me fjalët: “Më shumë se një mbret”.
Në postimin e ndarë në “story”, Nusret dhe Rama shfaqen së bashku në një ambient të brendshëm luksoz. Kryeministri Rama është i veshur me një kostum sportiv të zi dhe atlete të bardha, ndërsa Nusreti mban veshjen e tij karakteristike që e ka bërë të njohur në të gjithë botën.
Fotografia është realizuar në ambientet e stadiumit “Allianz Arena”, ku një natë më parë u zhvillua finalja e Ligës së Kampionëve.
Nusret Gökçe, i njohur botërisht si Salt Bae, është një shef kuzhine dhe biznesmen turk. Ai u bë viral në vitin 2017 falë mënyrës unike të përgatitjes dhe spërkatjes së mishit me kripë, duke u kthyer në një sensacion në internet. Sot, ai është themelues dhe pronar i zinxhirit të njohur të restoranteve luksoze “Nusr-Et”, të specializuara në biftekë.
