Vijon dëshmia e Henrik Hoxhajt në GJKKO në kuadër të procesit gjyqësor për dosjen “Plumbi i Artë”. Hoxhaj ka zbardhur një seri krimesh të kryera si ushtar i skuadrës së vrasësve me pagesë të të penduarit të drejtësisë, Nuredin Dumani.
Ai foli për njohjen me Festim Qolin, dijeninë që kishte për vrasjen e Elvis Dedjes, kontaktet me Erion Alibejn e thirrur “Krymi”, për Suel Çelën, Sokol Sanxhaktarin, Talo Çelën dhe vrasjet e Dorian Shkozës dhe Emiliano Ramazanit.
Hoxhaj: Festim Qolin e njoh prej 20 vitesh. Ai nuk më ka folur ndonjëherë për Nuredinin. E kam njohur tek ditëlindja e Festimit. Festimi më ka treguar se Elvis Dedjen e ka pasur ortak. Nuk e kam kryer unë vrasjen e tij dhe nuk di kush e ka bërë. Nuk mbaj mend të kem qenë me Festimin ditën e ngjarjes. Nuk kam folur ndonjëherë me Nuredinin për këtë ngjarje.
Sa i përket vrasjes së Dorian Shkozës, Hoxhaj pranoj përfshirjen në krim dhe thotë se ka qenë porosi e “Krymit” (Erion Alibejt).
Hoxhaj: Jam i përfshirë te vrasja e Dorian Shkozës. Porosia ka qenë e Krymit, (Erion Alibejt), por ndërmjetës ishte Nuredini. Shkak ishte pretendimi i Krymit se Shkoza kishte marrë pjesë te vrasja e familjarëve të tij. Nuk kishte informatorë në atë ngjarje. Asllan Plakun nuk e njoh. Erion Alibejn nuk e kam takuar ndonjëherë. Për vrasjen e Emiliano Ramazanit, Nuredini na ka thënë që merrte informacion nga Erion Alibej. Për Xhuliano Hoxhën, Nuredini nuk më ka folur ndonjëherë. Nuk ka qenë i përfshirë në këtë ngjarje dhe as e kam parë në ngjarje.
Hoxhaj iu rikthye edhe një herë porosisë për të vrarë Sokol Sanxhaktarin kundrejt pagesës 200 mijë euro, por që atentati ndaj dhëndrit të ish-kryebashkiakut të ndjerë socialist të Elbasanit, Qazim Sejdini, kishte dështuar.
Hoxhaj: E kam dëgjuar se kush është. Nuredini më ka thënë që ka qenë dhëndri i një kryebashkiaku atëherë. Nuk kemi marrë ndonjëherë porosi për vrasjen e tij, por e kemi diskutuar. Nuredini na ka thënë se kishte diskutuar me dikë për vrasjen e tij. Nuk kam shkuar ndonjëherë në Elbasan për ta vëzhguar.
Sa i përket atentatit të dështuar ndaj Lulzim Mashës, Hoxhaj thotë se ka marrë pjesë në ngjarje dhe objektiv ishte djali i tij, por në pamundësi për ta arritur, planifikuan t’i ekzekutonin të atin, që ta vrisnin më pas në varrim.
Hoxhaj: Kam marrë pjesë në ngjarje. Ka qenë porosi e vëllezërve Dizdari. Nuk di, për një punë borxhi. Sakati (Aleksander Baho) do na jepte informacion kur do të vinte në Shqipëri djali i Mashës, pasi për atë ishte porosia në fillim. Vrasjen (e mbetur në tentativë) të Lulëzim Mashës e kam organizuar unë. Për pagesën, unë kam marrë 10 mijë euro në fillim. Për djalin porosia ishte 150 mijë euro, për Lulzim Mashën ishte 100 mijëë, se 50 donte t’i merrte vetë.
Thotë se nuk ka njohje me Suel Çelën.
Hoxhaj: Nuk e njoh shtetasin Suel Çela. Nuk e kam takuar ndonjëherë.
Ndërsa për Oltion Kilën, e thirrur “Oti”, ai tregoi: Nuredini kishte bërë një listë. Ky ishte në listë, që duhej bërë. Ishte ky, ishin vëllezërit Ramazani. Më vonë Nuredini tha se kishtë informacion se ky kishte strehuar Talo Çelën.
