Gjykata ka caktuar sot maësn e sigurisë “arrest me burg” për 14-vjeçarin i cili goditi për vdekje me thikë, bashkëmoshatarin e tij, Martin Canin. Masa e sigurisë iu komunikua në ambientet e burgut, ku i mituri është shtruar dhe po merr trajtim mjekësor pasi dhe ai mbeti i plagosur gjatë sherrit me viktimën. Mario Përlleshit i është kërkuar disa herë të japë shpjegime lidhur me ngjarje por ka refuzuar të flasë. 14 vjeçari nuk ka pranuar as të tregojë se ku e ka fshehur armën e krimit.
“Nuk mbaj mend çfarë ka ndodhur”, raportohet se ka thënë ai.
Hetuesit janë kthyer sërish sot në vendin e ngjarjes, pasi nuk është gjetur as thika me të cilën është kryer krimi, dhe as telefoni e çanta e Përlleshit. Mësohet se policia ka sekuestruar pamje të tjera nga kamerat e sigurisë në zonë me qëllim identifikimin e bashkëpunëtorëve të dyshuar të autorit. Grupi hetimor po verifikon se kush janë personat që e morën nga vendngjarja dhe që e kanë ndihmuar për të fshehur provat e krimit.
