Një shqiptar, Ibrahim Sollaku, një 33-vjeçar, është dënuar me 10 vjet burg nga Gjykata e Kurorës në Winchester për organizimin e një rrjeti kriminal që merrej me krijimin e kushteve për kalimin ilegal të emigrantëve shqiptarë në Mbretërinë e Bashkuar dhe për trafikimin e lëndëve narkotike.
Sollaku pranoi se kishte bashkëpunuar me individë të tjerë për të transportuar pesë emigrantë nga Belgjika në Mbretërinë e Bashkuar në nëntor të vitit 2025. Ai organizoi që një shofer taksie të merrte emigrantët në një port belg, ku ata do të ngarkoheshin në një kamion për të kaluar Kanalin e La Manshës. Pasi të arrinin në Mbretërinë e Bashkuar, një tjetër shofer taksie do të merrte emigrantët dhe do t’i shpërndante nëpër komunitet.
Policia belge ndërhyri më 5 nëntor, arrestuar shoferin e taksisë dhe pesë emigrantët shqiptarë në qytetin e Bryzhit. Në të njëjtën ditë, Sollaku u arrestua nga oficerët e Njësisë Rajonale të Krimeve të Organizuara në Jugperëndim. Gjatë kontrollit të shtëpisë së tij, policia gjeti gjithashtu 105 gram kokainë të mbështjellë në plastmasë dhe 36 gram të tjera të shpërndara në 94 tube plastike, si dhe shënime dhe shuma parash që dyshoheshin se lidhen me trafikimin e lëndëve narkotike.
Në një seancë të mëvonshme, Sollaku pranoi se kishte në posedim drogë klasë A me qëllim shpërndarjen. Anja Hohmeyer, përfaqësuese e Prokurorisë së Kurorës, deklaroi se Sollaku luajti një rol kryesor në këtë komplot kriminal që synonte të sjellë illegalisht njerëz nga Shqipëria në Mbretërinë e Bashkuar. Ajo theksoi se ky rast është një rezultat i një operacioni të suksesshëm midis autoriteteve britanike dhe belge për të prishur rrjetet ndërkombëtare të trafikimit.
Adam Smith, drejtori i Krimeve të Organizuar në Jugperëndim, e përshkroi Sollakun si një kriminel të lidhur mirë, i përfshirë në krime të organizuara, duke theksuar se ai nuk i shqetësohej për rreziqet dhe dëmin që veprimet e tij shkaktonin, por vetëm për fitimet personale.
