Turqia është goditur nga një tjetër tragjedi ajrore. Pas rrëzimit të avionit ushtarak në kufirin me Gjeorgjinë dy ditë më parë, me 20 viktima, sot u raportua për një tjetër rënie dhe këtë herë një mjet fluturues zjarrfikës.
Avioni zjarrfikës turk AT802 është rrëzuar në Kroaci. Lajmi vjen në ditën e riatdhesimit të trupave të 20 personelit të Forcave Ajrore Turke, që u vranë në rrëzimin e C-130 në kufirin Gjeorgji-Azerbajxhan.
Sipas Ministrit të Bujqësisë dhe Pylltarisë, Ibrahim Yumakli, rrënojat e avionit zjarrfikës u gjetën pranë qytetit Senj, Kroaci. Raportohet se piloti ka humbur jetën.
“Shpreh ngushëllimet dhe lutjet e mia familjes dhe të dashurve të pilotit tonë që humbi jetën në këtë aksident tragjik. Ngushëllimet e mia organizatës sonë pyjore dhe njerëzve tanë të dashur”, tha Yumakli, sipas “Hurriyet”.
Mediat turke raportuan gjithashtu se në zonë u raportua një “avion që digjej”.
