Kryetari i Partisë Ora e Shqipërisë, Zef Shtjefni, është larguar nga koalicioni “Aleanca për Shqipërinë Madhështore”, i drejtuar nga kryetari i PD-së, Sali Berisha. Në një letër drejtuar kryekomisionerit Ilirjan Celibashi, Shtjefni ka sqaruar se bashkëpunimi me këtë koalicion nuk ka funksionuar që nga dita e parë e firmosjes së marrëveshjes.
Në dokumentin e dorëzuar në Komisionin Qendror të Zgjedhjeve, Partia Ora e Shqipërisë thekson se nuk është ftuar në asnjë nga takimet e zhvilluara në qytete dhe se kjo është arsyeja kryesore që ka çuar në vendimin për t’u tërhequr nga aleanca. Sipas Shtjefnit, ai ka marrë pjesë në hapjen e fushatës elektorale pa qenë i ftuar zyrtarisht.
“I nderuar z. Kryekomisioner, ju informoj se bashkëpunimi i Partisë Ora e Shqipërisë me Aleancën për Shqipërinë Madhështore nuk ka funksionuar që nga dita e nënshkrimit të marrëveshjes. Kryetari i partisë nuk është përfshirë në listën e hapur, ndërsa partia jonë nuk është ftuar në hapjen e fushatës. Kryetari mori pjesë në takim pa ftesë zyrtare. Në këto kushte, kjo aleancë ka shkelur marrëveshjen me partinë tonë, ndaj kërkojmë të largohemi nga ky koalicion që nuk respekton angazhimet ndaj aleatëve,” thuhet në letrën zyrtare.
