Ka nisur sot zyrtarisht dita e parë e rinumërimit të votave për Qarkun e Fierit, në ambientet e stadiumit “Farie Hoti” në Tiranë. Pas përfundimit të rinumërimit në Qarkun e Tiranës, që zgjati 9 ditë, administrata e Komisionit Qendror të Zgjedhjeve (KQZ), e vendosur në 24 tabela me grupe numërimi, po numëron me kujdes çdo votë nga çdo qendër votimi.
Deri në këto momente nuk ka të dhëna për mos-përputhje të shifrave, pas hapjes së kutive pritet që të raportohen çdo ndryshim i mundshëm. Nga rinumërimi i kutive të para të Fierit do të kuptohet edhe trendi i përputhshmërisë së rezultateve, si dhe nëse do të ketë kandidatë me vota më shumë ose më pak se në raportimet fillestare, siç ndodhi me Tiranën.
Një nga kandidatët më të rrezikuar nga ky rinumërim është Zegjine Caushi, e cila fitoi mandatin në garën e 11 Majit falë votave të diasporës, me një diferencë prej më pak se 40 votash ndaj kandidates tjetër në listë, Mardrita Bardhi. Në rast se konfirmohen parregullsitë, ajo mund të humbasë mandatin.
Përveç kësaj, gara në Fier është shumë e ngushtë midis Partisë Socialiste dhe koalicionit ‘Shqipëria Bëhet’, Adriatik Lapajt, të cilët ndahen vetëm nga rreth 500 vota. Kjo bën që rinumërimi të ketë një rëndësi të veçantë për rezultatin përfundimtar.
Ende është herët për të parashikuar nëse rinumërimi do të ndryshojë rezultatin përfundimtar, por vëmendja mbetet e lartë për zhvillimet e ditëve në vijim.
