Gjykata e Lartë e SHBA ka rrëzuar këtë të mërkurë kërkesën e administratës Trump për të mbajtur të ngrira miliarda dollarë ndihmë për ndihmën e huaj, të miratuar nga Kongresi dhe që prek edhe Shqipërinë.
Kujtojmë se nga ngrirja e këtyre fondeve preku dhe ato për drejtësinë shqiptare, midis tyre edhe prokuroria e Posaçme, SPAK. Në atë kohë, përmes zyrës së shtypit SPAK reagoi dhe deklaroi se është një institucion i pavarur që mbështetet tërësisht në buxhetin e shtetit shqiptar.
Megjithatë, gjykata nuk tha një datë të caktuar se deri kur duhet të “lirohen” duke i dhënë kështu mundësinë Shtëpisë së Bardhë të vazhdojë të kundërshtojë çështjen në gjykatat më të ulëta.
Vendimi u mbështet nga 5 gjyqtarë, ndërsa 4 votuan kundër. Shumica vuri në dukje se duke qenë se një afat i urdhëruar nga gjykata për të shpenzuar paratë javën e kaluar kishte kaluar tashmë, gjykatat më të ulëta duhet të “qartësojnë se çfarë detyrimesh duhet të përmbushë qeveria për të siguruar respektimin e urdhrit të ndalimit të përkohshëm”.
“Urdhri i panënshkruar në fakt nuk kërkon që administrata Trump të bëjë menjëherë deri në 2 miliardë dollarë pagesa të ndihmës së huaj, ai thjesht i hap rrugën gjykatës së rrethit për t’i bërë pagesat, me sa duket nëse është më specifike për kontratat që duhet të respektohen”, tha Steve Vladeck, analist i Gjykatës së Lartë dhe profesor në Qendrën Juridike të Universitetit Georgetown, duke theksuar se ato projekte që kanë nisur dhe janë miratuar, do duhet që paguhen.
Në qendër të kësaj çështjeje janë miliarda ndihma të huaja nga Departamenti i Shtetit dhe Agjencia Amerikane për Zhvillim Ndërkombëtar, të cilat Trump i ngriu në janar, ndërsa u përpoq të shtrëngonte shpenzimet dhe t’i sillte ato agjenci në përputhje me axhendën e tij.
Gjykatësi i qarkut i SHBA Amir Ali më 13 shkurt urdhëroi që pjesa më e madhe e parave të vazhdonin të rrjedhin në baza të përkohshme ndërsa ai shqyrtonte çështjen. Ditë më vonë, paditësit argumentuan se administrata po e sfidonte atë urdhër dhe po vazhdonte të bllokonte shpenzimet, që pasoi më pas një urdhër tjetër për administratën e Trump.
Administrata Trump doli me një apel urgjent në Gjykatën e Lartë disa orë përpara këtij afati, duke i kërkuar që të paktën ta ndalonte atë për disa ditë.
Administrata Trump zbuloi në dosjet gjyqësore se po përpiqet të përfundojë më shumë se 90% të dhënies së ndihmës së huaj të USAID-it.
Programet e ndihmës në mbarë botën janë ndalur për shkak të ngrirjes së fondeve dhe rishikimit të ndihmës prej miliarda dollarësh. Kjo gjithashtu vjen pasi administrata Trump ose ka vendosur shumicën e fuqisë punëtore të USAID-it në pushim ose i ka pushuar ata.
